काठमाडौं । १४८ औँ घुम्ती कवि गोष्ठी कागेश्वरी मनोहरा नगरपालिकाको भद्रवासमा सम्पन्न भएको छ ।शनिबार भद्रवासस्थित भवानी पौडेल स्मृति प्रतिष्ठान, जग्रेश्वर मन्दिर प्राङ्गणमा कार्यक्रम गरिएको हो ।
घुम्ती कवि गोष्ठी नेपालमार्फत हरेक महिनाको दोस्रो शनिबार कार्यक्रम हुँदै आएको छ । कार्यक्रमको आयोजना भने फरक–फरक स्थानमा हुने गर्दछ । यसपटक भवानी पौडेल स्मृति प्रतिष्ठानले कार्यक्रमको आयोजना गरेको हो ।कार्यक्रममा विभिन्न स्थानबाट उपस्थित ४० भन्दा बढी साहित्यकारले कविता, मुक्तक प्रस्तुत गरेका थिए ।
घुम्ती कवि गोष्ठी नेपालका अध्यक्ष माधव श्रेष्ठले यसपटकको श्रृङ्खला भद्रवासमा गरिएकोमा खुसी व्यक्त गरे । प्रमुख अतिथि अभिनव साहित्य प्रतिष्ठानका अध्यक्ष गोविन्दप्रसाद घिमिरे ‘वेदमणि’ ले छोटा कविता लेख्नुपर्नेमा जोड दिए । उनले युवापुस्तालाई पनि सँगै समेटेर अघि लैजानुपर्ने आवश्यकता औँल्याए ।
कार्यक्रमका सभापति पौडेल स्मृति प्रतिष्ठानका अध्यक्ष वासु पौडेलले कार्यक्रमको आयोजना गर्न पाएकोमा आभार व्यक्त गरे ।
